Shad Azimabadi
bhaga to bahut tha maut se main kam-bakht ne lekin aan liya
un lakhon hi marne valon men kya jald mujhe pahchan liya
jab qatl hua main tadpa bhi chhinten bhi udain maan liya
ilzam khud us par kya ye nahin daman ko na kyuun gardan liya
tu aam farebi mujh se na kar ham mard hain sun le ai duniya
jo munh se kaha vo kar guzre jo thaan liya vo thaan liya
aqsam the yas-o-hasrat ke asnaf-e-umid-e-behad ke
jab chalne lage ham duniya se saath apne bahut saman liya
jis haath se mujh ko qatl kiya us haath ka kalima padhvaya
li jaan to khair ehsan kiya qatil ne magar iman liya
mai-khana hai ja-e-aish-o-tarab yaan baith ke rona kya maani
kya muft ka apne sar tu ne ai dida-e-tar tufan liya
us ghar men karam jab tu ne kiya kuchh der thahar ai tir-e-nazar
bosa tire qadmon ka dil ne kis shauq se ai mehman liya
aram-talab hone ka guman juuya pe tire la-haul vala
tab paanv ko tode baitha huun jab dasht-o-jabal ko chhan liya
jis bhes men tu ho kya parva ainda na khaegi dhoka
ai talib-e-duniya duniya ne har tarah tujhe pahchan liya
thi dhaar rag-e-gardan pe miri siina bhi daba tha qadmon se
khanjar ka tire bosa ham ne munh pher ke ta-imkan liya
ai ‘shad’ abas hai us ka gila vo hajv kare ya tujh se phire
ta-hashr raha shagird tira ustad tujhe jab maan liya
Leave a Reply