nikal aaya vo ghabra kar dil us ka is qadar dhadka
sada bijli ki di naale ne jab munh se mire kadka
thahar kuchh din men dast-andaziyon ka vaqt aaega
nihal-e-nau-damida huun bharosa kya miri jad ka
hamesha khak-o-khun men mujh ko betabi bithaya ki
ba-shakl-e-murgh-e-bismil kaun se pahlu nahin phadka
khayal-e-ariz-e-raushan men subh-o-sham yaksan hai
yahan athon-pahar pesh-e-nazar hai nuur ka tadka
ye sach hai vaqt par be-raunaqi bhi kaam aati hai
nihal-e-khushk ko khatka nahin hota hai patjhad ka
na kyuun pinhan rakhun daman men us ko kam-nigahon se
samajhta huun main apna ashk-e-gulgun laal gudad ka
guzarta hai salamat vaqif-e-anjam matlab se
nahin rasta khatakta aankh men dahqan ki bihad ka
liye hain gul ke bose aaj kis chori se bulbul ne
pada soya kiya gulchin koi patta nahin khadka
chhupaya parda-e-fanus ban kar jism-e-uryan ne
darun-e-ustukhvan se jis ghadi shoala koi bhadka
ba-juz iima kalam-e-ishq matlab se muarra hai
kisi par raaz khul sakta nahin majzub ki bad ka
fasahat ke khilaf aae nazar sab qafiye ham ko
‘nasim’ aisi zamin par kijiye itlaq bihad ka
Leave a Reply