kis hiddat se guzre kaise phuul hue
kya mausam tha jab angare phuul hue
chhachh bilone vaali muddat ba.ad hansi
divaron par chaspan uple phuul hue
resha bunti makḌi ḳhushbu men Duubi
ik aahaT par saare jaale phuul hue
us dar ke phulon ka aalam kya hoga
jis ko chhu kar mere jaise phuul hue
ghar ne dekh liya aate pardesi ko
khil uTThe darvaze taale phuul hue
chauk men ik tasvir laga.i phulon ki
dekha dekhi charon raste phuul hue
ham hain jin par ma.ani badle jaate hain
ham hain jin par kankar tere phuul hue
itni mohlat khilne aur mahakne ki
gham ne di aur ham bhi us ke phuul hue
kanTe us zarḳhez nazar ke shaida.i
jo bhi is men aan sama.e phuul hue
jab tak harf rahenge tum bhi mahkoge
tum mere ash.ar men aa.e phuul hue
Leave a Reply