subuk hoti hava se tez chalna chahti huun
main ik jalte diye ke saath jalna chahti huun
ghubar-e-be-yaqini ne mujhe roka hua hai
zamin se phuuT kar bahar nikalna chahti huun
main ḳhud sahmi hui huun aa.ine ke TuTne se
bahut ahista sat.h-e-dil pe chalna chahti huun
numud-e-sub.h se pahle ka lamha dekhne ko
andheri raat ke paikar men Dhalna chahti huun
main shahr-e-shab ko ankhon ki dua dene se pahle
dar-o-divar ka chehra badalna chahti huun
kisi ke ḳhvab ki takmil men patthar hui thi
ab apne ḳhvab ki lau se pighalna chahti huun
Leave a Reply