Irfan Waheed
hazar ranj-e-safar hai hazar ke hote hue
ye kaisi ḳhana-badoshi hai ghar ke hote hue
vo habs-e-jan hai barasne se bhi jo kam na hua
ghuTan ghazab ki hai ik chashm-e-tar ke hote hue
mire vajud ko paikar ki hai talash abhi
main ḳhaak huun hunar-e-kuzah-gar ke hote hue
sahar ujalne vaale kiran kiran ke liye
taras rahe hain farogh-e-sahar ke hote hue
har inkishaf hai ik inkishaf-e-la-ilmi
kamal-e-be-ḳhabari hai ḳhabar ke hote hue
gurezan mujh se raha hai ye saya-e-divar
main dhuup dhuup jala huun shajar ke hote hue
ham us se mil ke karen arz-e-hal kuchh ‘irfan’
muhal hai ye dil-e-hila-gar ke hote hue
Leave a Reply