barson tapish-e-gham men ye ehsas jale hai
tab ja ke kahin sher ke sanche men Dhale hai
kuchh aise teri bazm men baiTha huun akela
jis tarah sar-e-rah koi sham.a jale hai
allah kisi shaḳhs ko rusva na kare yuun
mujh se mira saaya bhi to ab bach ke chale hai
is manzil-e-dushvar se hans hans ke guzar ja
pagle kahin rone se shab-e-hijr Dhale hai
har roz naya ruup badalti hai teri yaad
aahon men Dhale hai kabhi ashkon men Dhale hai
har shahr men hone lagi angusht-numa.i
rusva.i miri mujh se bhi kuchh aage chale hai
ik roz use TuuT hi jaana tha bahar-hal
dil toḌ ke tu kyuun kaf-e-afsos male hai
Leave a Reply