purkhon se jo mili hai vo daulat bhi le na jaa.e
zalim hava-e-shahr hai izzat bhi le na jaa.e
vahshat to sang-o-ḳhisht ki tartib le ga.i
ab fikr ye hai dasht ki vus.at bhi le na jaa.e
pichhe paḌa hai sab ke jo parchha.iyon ka paap
ham se adavaton ki vo aadat bhi le na jaa.e
angan ujaḌ gaya hai to gham is ka ta-ba-kai
mohtat rah ki ab ke vo ye chhat bhi le na jaa.e
barbadiyan sameTne ka us ko shauq hai
lekin vo un ke naam pe barkat bhi le na jaa.e
aadil hai us ke adl par ham ko yaqin hai
lekin vo zulm sahne ki himmat bhi le na jaa.e
un sohbaton ka zikr to zikr-e-fuzul hai
Dar hai ki lutf-e-shukr-o-shikayat bhi le na jaa.e
ḳhud se bhi baḌh ke us pe bharosa na kijiye
vo aa.ina hai dekhiye surat bhi le na jaa.e
Leave a Reply