Poet
duur tak nahin milti raah shadmani ki
ishq jis ko kahte hain bhuul hai javani ki
koi shai agar bhati is jahan-e-fani ki
ham bhi aarzu karte umr-e-javedani ki
aap mere ashkon ko len na apne daman par
aap ko nahin malum aag hai ye paani ki
aaj apni ḳhuddari ban ga.i sipar varna
choT kha ga.e hote un ki mehrbani ki
aisa lag raha hai ab un ke hijr men jaise
maut ne badal li hai shakl zindagani ki
ghuT ke rah ga.e dil men dil ke saare afsane
kab zaban samajhta hai koi be-zabani ki
ḳhaar se shanasa.i chashm-poshiyan gul se
ye ada bhi dekhi hai ham ne baghbani ki
ab jahan bhi le jaa.e ab jidhar bhi le jaa.e
dil ko saunp di ham ne rahbari javani ki
miT ga.i vafa to phir dil men kya raha baaqi
ek hi nishani thi meri be-nishani ki
ai dil-e-sitam-ḳhurda un se rahm ki hasrat
ik dalil-e-puḳhta hai teri na-tavani ki
ai ‘ḳhalish’ mujhe duniya kis tarah bhula.egi
jaan ban gaya huun main is ki har kahani ki
Leave a Reply