Akhtar Ansari
mohabbat hai aziyyat hai hujum-e-yas-o-hasrat hai
javani aur itni dukh bhari kaisi qayamat hai
vo maazi jo hai ik majmua ashkon aur aahon ka
na jaane mujh ko is maazi se kyuun itni mohabbat hai
lab-e-dariya mujhe lahron se yunhi chahal karne do
ki ab dil ko isi ik shughl-e-be-ma.ani men rahat hai
tira afsana ai afsana-ḳhvan rangin sahi mumkin
mujhe rudad-e-ishrat sun ke ro dene ki aadat hai
koi roe to main be-vaj.h ḳhud bhi rone lagta huun
ab ‘aḳhtar’ chahe tum kuchh bhi kaho ye meri fitrat hai
Leave a Reply