jo naam sab se ho pyara use makan pe likh
badan ki had se guzar aur is ko jaan pe likh
baja hai karte hain paani pe dastaḳhat sab log
jo hausla hai to naam apna asman pe likh
tu likhne baiTha hai mere ḳhulus ka qissa
yaqin par nahin likhta na likh guman pe likh
sahifa-e-dil-e-betab ki na.i tafsir
qalam uTha aur use vaqt ki zaban pe likh
safar mudam safar hi to hai safar ka sila
tu apna qissa-e-la-samtiyat uḌaan pe likh
sanvar shana-e-fan se tu zulf-e-qaus-e-quzah
tu zindagi ke ḳham-o-pech phir kaman pe likh
jo ”qul” masur pe likhte hain un ka fan hai juda
tu ḳhun-e-dil se koi sher martaban pe likh
har ek chiiz yahan prem hi se milti hai
ye ishtihar ‘karamat’ tu har dukan pe likh
Leave a Reply