Yunus Ghazi
kahiye kin lafzon men ashkon ki kahani likkhun
mo’tariz aap lahu par hain to paani likkhun
un ko apna sa lage aur ho qissa mera
dil ki ḳhvahish hai ki ik aisi kahani likkhun
daagh jitne bhi hain gulzar-e-tamanna men mere
phuul ki tarah unhen teri nishani likkhun
laakh afsane tarashe hain na.e duniya ne
main to jab jab bhi likhun baat purani likhun
mere ḳhame ko ye taufiq ata kar yarab
ḳhuun ko ḳhuun likhun paani ko paani likkhun
ishq hai ziist ki rag rag men lahu ki manind
javedan ishq ko kis tarah main faani likkhun
haan main ‘ghazi’ huun mire fan ka taqaza hai yahi
ḳhuun ro.e jo paḌhe vo bhi kahani likkhun
Leave a Reply