udasi ka samundar dekh lena
miri ankhon men aa kar dekh lena
hamare hijr ki tamhid kya thi
miri yadon ka daftar dekh lena
tasavvur ke labon se chuum lunga
tiri yadon ke patthar dekh lena
nujumi ne ye ki hai pesh-goi
rula.ega muqaddar dekh lena
na rakhna vasta tum mujh se lekin
miri hijrat ka manzar dekh lena
tamanna hai agar milne ki mujh se
mujhe mere hi andar dekh lena
makan shishe ka banvate ho ‘azar’
bahut a.enge patthar dekh lena
Leave a Reply