ab vo gali ja-e-khatar ho gai
haal se logon ko khabar ho gai
vasl ki shab kya kahun kyuun kar kati
baat na ki thi ki sahar ho gai
dekhenge ai zabt ye daave tire
raat judai ki agar ho gai
hazrat-e-naseh ne kahi baat jo
ham-asar-e-dard-e-jigar ho gai
main na hua ghair hue mustafiz
teri nazar thi vo jidhar ho gai
yaad kisi ki mujhe phir in dinon
josh-zan-e-dida-e-tar ho gai
kis ki ham-aghoshi ka tha azm jo
zulf tiri tauq-e-kamar ho gai