Zafar Moradabadi
raat bhar suraj ke ban kar ham-safar vapas hue
shaam bichhḌe ham to hangam-e-sahar vapas hue
jalva-gah-e-zat se kab ḳhud-nigar vapas hue
aur agar vapas hue to be-basar vapas hue
thi hamen malhuz-e-ḳhatir nek-nami is qadar
chuum kar nazron se un ke bam-o-dar vapas hue
muzhda parvaz-e-adam ka hai ki rahat ki naved
dam labon par hai to apne bal-o-par vapas hue
shauq-e-manzil tha kahan mujh sa kisi ka mo’tabar
do qadam bhi chal na paa.e ham-safar vapas hue
karvan se jo bhi bichhḌa gard-e-sahra ho gaya
TuuT kar patte kab apni shaḳh par vapas hue
sub.h dam le kar chali ghar se talash-e-rozgar
shaam ham ruḳh par liye gard-e-safar vapas hue
zindagi men aa.iin sub.hen aur shamen bhi bahut
ahd-e-rafta ke kahan sham-o-sahar vapas hue
aḳhirash bujh hi gaya hai ḳhush-gumani ka charagh
tum bichhaḌ kar phir kahan imkan bhar vapas hue
ḳhush-gumani ka bharam rakkha na.i pahchan ne
phir mire naghmon men Dhal kar sim-bar vapas hue
hosh se aari rahi divangi apni ‘zafar’
ba-ḳhabar mahfil men rah kar be-ḳhabar vapas hue
Leave a Reply