Poet
ḳhali hai zehn taqat-e-guftar kya kare
hai aankh band rauzan-e-divar kya kare
ham aql dil ke samne rakhte rahe vale
dariya ke aage ret ki divar kya kare
ji mera ab to meri bhi sohbat se tang hai
har rishta yaan hai ba.is-e-azar kya kare
har-su hai ka.enat men apne lahu ka rang
ho chashm-e-dil se duur to didar kya kare
kahta huun baar baar samajhta nahin koi
bahra ho dil to baat pe israr kya kare
juz tegh dard-e-jan ka nahin koi shai ilaaj
ḳhali hai haath dida-e-ḳhun-bar kya kare
har falsafe se shauq hai azad sar-ba-sar
iqrar kya kare yahan inkar kya kare
uljhe hue hain kitne tamanna ke silsile
ai ḳhaliq-e-hayat gunahgar kya kare
rah-e-nabi men bachche javan-pir sab ga.e
ḳheme men tanha abid-e-bimar kya kare
Leave a Reply