Kisi KHamosh Chehre Par Wo Itminan Ka Manzar

kisī ḳhāmosh chehre par vo itmīnān kā manzar

jigar ko kāTtā hai ab bhī qabristān kā manzar

azāb-e-shiddat-e-karb-e-judā.ī ko vo kyā jaane

ki dekhā hī na ho jis ne nikaltī jaan kā manzar

uThī kursī kaTā sabza gire patte uḌī chiḌiyāñ

tumhāre ba.ad kyā se kyā huā dālān kā manzar

kahāñ huuñ kaun huuñ ye pūchhtā phirtā huuñ logoñ se

ki mujh se kho gayā shāyad mirī pahchān kā manzar

darīda-naqsh zaḳhmī lafz larzīda qatāroñ meñ

lahū meñ kis ne rangā hai mire dīvān kā manzar

hamāre qatl par chashm-e-falak meñ ḳhuun utregā

fazāoñ meñ sajegā surḳh se tūfān kā manzar

nahā ke pyaar kī bārish meñ us ne dhuup jab pahnī

nazar meñ ghul gayā qaus-e-quzah ke thaan kā manzar

darūn-e-zehn jab zebā.ish-e-afkār hī na ho

gharoñ meñ kyā hai phir ārā.ish-e-sāmān kā manzar

vo jitne diip andar haiñ vo āñkhoñ meñ hī jalte haiñ

aur āñkheñ hī dikhātī haiñ dil-e-vīrān kā manzar

samajhtā huuñ tirī saarī kahānī maiñ ki kyā hogī

hai dikhne meñ agar aisā tire unvān kā manzar

bharī duniyā kā ‘tāhir’ chappa chappa chhān maarā hai

nahīñ paayā kahīñ bhī shahr-e-pākistān kā manzar

Leave a Comment