Nahin Ye Rasm-E-Mohabbat Ki Ishtibah Karo

Zahid Chaudhry

nahin ye rasm-e-mohabbat ki ishtibah karo

kiya hai ishq to har haal men nibah karo

nahin hai ishq to phir zindagi men kuchh bhi nahin

kisi se ishq karo aur be-panah karo

karunga main tiri mahfil ki raunaqen do-chand

meri taraf bhi agar lutf ki nigah karo

suna hai sair-e-chaman ko vo aa rahe hain aaj

junun-e-shauq ko bar-vaqt intibah karo

shi.ar-e-husn ki tauqir ka taqaza hai

mariz-e-ishq se tajdid-e-rasm-o-rah karo

miri tarah na raho alam-e-taḳhayyul men

miri tarah na bhari zindagi tabah karo

agar maqam hai matlub bazm-e-ulfat men

gham-e-firaq ki shiddat men zabt-e-ah karo

jahan men rasm-e-sitam nang-e-admi.yat hai

sitam ke daur ki har chiiz ko tabah karo

namaz-e-did ke anjam par mujhe dil ka

ye mashvara hai ki ab tauf-e-jalva-gah karo

janab-e-shaiḳh ko dekha hai main ne ḳhalvat men

agar yahi hai sharafat to phir gunah karo

shi.ar-e-makr-o-riya maulvi se mat sikho

na apne nama-e-a.amal ko siyah karo