ujaḌ ujaḌ ke sanvarti hai tere hijr ki shaam
na puchh kaise guzarti hai tere hijr ki shaam
ye barg barg udasi bikhar rahi hai miri
ki shaḳh shaḳh utarti hai tere hijr ki shaam
ujaaḌ ghar men koi chand kab utarta hai
saval mujh se ye karti hai tere hijr ki shaam
mire safar men ik aisa bhi moḌ aata hai
jab apne aap se Darti hai tere hijr ki shaam
bahut aziiz hain dil ko ye zaḳhm zaḳhm ruten
inhi ruton men nikharti hai tere hijr ki shaam
ye mera dil ye sarasar nigar-ḳhana-e-gham
sada isi men utarti hai tere hijr ki shaam
jahan jahan bhi milen teri qurbaton ke nishan
vahan vahan se ubharti hai tere hijr ki shaam
ye hadisa tujhe shayad udaas kar dega
ki mere saath hi marti hai tere hijr ki shaam
Leave a Reply