ḳhud se hai ranj-bayānī apnī
kaan apne haiñ kahānī apnī
roz dīvār pe dastak denā
baat patthar ko sunānī apnī
umr auroñ ko hī raTte guzrī
bhuul baiThā huuñ nishānī apnī
din ko sochoñ kī chitā par jalnā
raat ko raakh uThānī apnī
gul-badan baaġh faqat terā hai
nashsha apnā hai javānī apnī
rū-ba-rū tere burā ban jaanā
ham ko ḳhud ḳhaak uḌānī apnī
maiñ kiye jaatā huuñ apnī bāteñ
vo sunātā hai kahānī apnī
haar kar sulh adū se ‘nayyar’
aabrū jhuk ke uThānī apnī