mahsus jo karte ho ye halchal mire andar
kuchh TuTta rahta hai musalsal mire andar
honThon pe tabassum ke gulabon ki numa.ish
hai nag-phani ka koi jangal mire andar
mushkil hai ki ye pyaas miri kaise miTegi
sahra hain mire honTh to badal mire andar
is baar jo us ne mujhe bahar se sameTa
is baar hua ḳhvab mukammal mire andar
is ruuh ko azad karo jism se jaldi
mar jaa.e na ghuT ghaT ke ye pagal mire andar
Leave a Reply