Asad Rizvi
chaman se gul se vo rishta purana DhunDte rahna
andheron men bhi apna ashiyana DhunDte rahna
kabhi alam-e-dauran se na thak kar baiTh jaana tum
mohabbat ka uḳhuvvat ka zamana DhunDte rahna
kisi ik par nahin rukti nazar apni tabi.at hai
hasin chehron pe zauq-e-dilbarana DhunDte rahna
miri nindon men ḳhvabon men hai ye ḳhvahish chhupi paiham
tumhare vasl ka sapna suhana DhunDte rahna
‘asad’ hai justuju jis ki use paana to hai aksar
yunhi rahna safar men ana-jana DhunDte rahna
Leave a Reply