zamin se uTThe hain ya asman se aa.e hain
ye log shahr men jaane kahan se aa.e hain
unhin ko haq hai baharon ke ḳhair maqdam ka
guzar ke jo kisi daur-e-ḳhizan se aa.e hain
hadaf koi ho kahin ho yaqin hai mujh ko
ye saare tiir usi ki kaman se aa.e hain
vahan se lauT ke aane ka dil na karta tha
palaT ke shahr men apne jahan se aa.e hain
ye kaun log hain milne ke vaste ham se
idhar udhar se yahan se vahan se aa.e hain
Leave a Reply