Ab Bhi Zarron Pe Sitaron Ka Guman Hai Ki Nahin

Alamtaab Tishna

ab bhi zarron pe sitaron ka guman hai ki nahin

zer-e-pa ab bhi tire kahkashan hai ki nahin

ab bhi vo jashn-e-tarab hai ki nahin maqtal men

ik tamashe ko hujum-e-nigaran hai ki nahin

ab bhi fariyad-ba-lab hai ki nahin randa-e-ishq

vo hi be-chargi-e-dil-zadagan hai ki nahin

kahiye nam hai ki nahin chashm-e-nadamat-asar

qafile valon ko ehsas-e-ziyan hai ki nahin

har gul-e-nam ke liye hai ki nahin gardish-e-chak

ye jahan kargah-e-kuza-garan hai ki nahin

vo mira dushman-e-jan hai ki nahin sang-ba-dast

ra.egan koshish-e-sad-shisha-garan hai ki nahin

’tishna’ kuchh sab se juda hai ki nahin teri ghazal

munfarid ‘sauda’ ka andaz-e-bayan hai ki nahin