Lafz Ki Chhanw Mein

lafz ki chhanv men

niim ki pattiyon ka safar talkh sa

silni jism men ruuh bechain bhi

shahriyat ke taqaze jo tuute kabhi

zindagi ke amal men bhi shak aa pada

tuut kar kis tarah jud gai chandni

dhuup lamhon ke chehron se girti hui khaak men ja mili

sar jhukae hue kaun sadkon pe yuun tujh ko dhunda kare

ham-kalami ki izzat ka badal sada sar pe saaya fagan

jab teri khamushi ke maani ke honton se tapke hue

duudh ke chand qatre samundar bane

badbanon ke aghosh khole hue kashtiyan chal padin

tishnagi ke jaziron pe saaya kahan

subh ka mom pighla to khvabon ke dil bujh gae

bujh gai raat bhi

bujh gai lafz ke haath ki baat bhi

lafz maidan men sar-nigun rah gae

sangsari ki lazzat lahu ban gai

kaun poshida jazbon ki chilman bane

lafz ki chhanv men koi suraj dhale