Saif Zulfi
tanha.i ke sho.alon pe machalne ke liye tha
kya mujh sa javan aag men jalne ke liye tha
kya katib-e-taqdir se zaḳhmon ki shikayat
jo tiir tha tarkash men so chalne ke liye tha
jalta hai mire dil men paḌa daagh ki surat
jo chand sar-e-arsh nikalne ke liye tha
is jhiil men tujh se bhi koi lahr na uThi
aur tu miri taqdir badalne ke liye tha
mayus na ja aa gham-e-dauran mire nazdik
tu hi miri banhon men machalne ke liye tha
ye Dasti hui raat guzar ja.egi yaaro
vo hansta hua din bhi to Dhalne ke liye tha
kuchh aanch mire lams ki garmi se bhi pahunchi
vo barf sa paikar bhi pighalne ke liye tha
tafriq ne mulkon ki tarashe hain aqa.ed
insan bas ik raah pe chalne ke liye tha
zinda hai miri fikr mire karb se ‘zulfi’
ye phuul isi shaḳh pe phalne ke liye tha
Leave a Reply