Jaikrishn Chaudhry Habeeb
yuun tasavvur men khile gul hain teri baat ke baad
jaise gulshan men nikhar jaa.e faza raat ke baad
be-qarari na ga.i aur na miTi dil ki ḳhalish
na mulaqat se pahle na mulaqat ke baad
gham-e-duniya bhi nahin ḳhvahish-e-uqba bhi nahin
kya raha dil men mire ishq ke jazbat ke baad
shaam rangin hain sahar men hai na vo kaif-o-surur
teri sohbat men vo guzre hue lamhat ke baad
rah-rav-e-shauq hi kya jo sar-e-manzil na luTa
bazi-e-ishq men aata hai maza maat ke baad
ru-ba-ru tere koi baat bana.e na bane
kis tarah baat bane meri tiri baat ke baad
mai men masti hai na mai-ḳharon men vo josh-o-ḳharosh
mai-kada suuna hua rind-e-ḳharabat ke baad
bada-e-husn se sarshar rahe roz ‘habib’
kaif har kaif hai har raat men har raat ke baad
Leave a Reply