haidar-ali-aatish

Fareb-E-Husn Se Gabr-O-Musalman Ka Chalan Bigda

fareb-e-husn se gabr-o-musalman ka chalan bigda

khuda ki yaad bhula shaikh but se barhaman bigda

qaba-e-gul ko phada jab mira gul-pairahan bigda

ban aai kuchh na ghunche se jo vo ghuncha-dahan bigda

nahin be-vajah hansna is qadar zakhm-e-shahidan ka

tiri talvar ka munh kuchh na kuchh ai tegh-zan bigda

takalluf kya jo khoi jan-e-shirin phod kar sar ko

jo thi ghairat to phir khusrav se hota kohkan bigda

kisi chashm-e-siyah ka jab hua sabit main divana

tu mujh se sust hathi ki tarah jangali hiran bigda

asar iksir ka yumn-e-qadam se teri paaya hai

jozami khak-e-rah mal kar banate hain badan bigda

tiri taqlid se kabk-e-dari ne thokaren khain

chala jab janvar insan ki chaal us ka chalan bigda

zaval husn khilvata hai meve ki qasam mujh se

lagaya daagh khat ne aan kar seb-e-zaqan bigda

rukh-e-sada nahin us shokh ka naqsh-e-adavat se

nazar aate hi aapas men har ahl-e-anjuman bigda

jo bad-khu tifl-e-ashk ai chashm-e-tar hain dekhna ik din

gharaunde ki tarah se gumbad-e-charkh-e-kuhan bigda

saf-e-mizhgan ki jumbish ka kiya iqbal ne kushta

shahidon ke hue salar jab ham se tuman bigda

kisi ki jab koi taqlid karta hai main rota huun

hansa gul ki tarah ghuncha jahan us ka dahan bigda

kamal-e-dosti andesha-e-dushman nahin rakhta

kisi bhanvre se kis din koi mar-e-yasman bigda

rahi nafrat hamesha dagh-e-uryani ko phaae se

hua jab qata jaama par hamare pairahan bigda

ragadvain ye mujh se ediyan ghurbat men vahshat ne

hua masdud rasta jada-e-rah-e-vatan bigda

kaha bulbul ne jab toda gul-e-sausan ko gulchin ne

ilahi khair kiijo nil-e-rukhsar-e-chaman bigda

irada mere khane ka na ai zagh-o-zaghan kiijo

vo kushta huun jise sunghe se kutton ka badan bigda

amanat ki tarah rakkha zamin ne roz-e-mahshar tak

na ik mu kam hua apna na ik tar-e-kafan bigda

jahan khali nahin rahta kabhi iza-dahindon se

hua nasur-e-nau paida agar zakhm-e-kuhan bigda

tavangar tha bani thi jab tak us mahbub-e-alam se

main muflis ho gaya jis roz se vo sim-tan bigda

lage munh bhi chidhane dete dete galiyan sahab

zaban bigdi to bigdi thi khabar liije dahan bigda

banavat kaif-e-mai se khul gai us shokh ki ‘atish’

laga kar munh se paimane ko vo paiman-shikan bigda

More Poems

Leave a Comment