main jis din se akeli ho ga.i huun
main kaisi thi main kaisi ho ga.i huun
nahin kuchh yaad rahta hain mujhe ab
bichhaḌ kar tum se pagli ho ga.i huun
tasavvur ne tire mujh ko chhua phir
achanak se main achchhi ho ga.i huun
tira gham mujh ko raas aane laga hai
bikhar kar phir ikaTThi ho ga.i huun
pareshani ye mujh se hans ke boli
tire ghar ki main bachchi ho ga.i huun
jo mera ho ke mera ho na paaya
na ho kar bhi usi ki ho ga.i huun
mujhe phir lauT ke jaana hai us tak
jo mera tha usi ki ho ga.i huun
jise dekho vo hi kahta hai mujh se
sarapa ik udasi ho ga.i huun
‘siya’ kuchh din se bojhal hai bahut dil
main ro ro kar ke halki ho ga.i huun
Leave a Reply