jhuTi ḳhabren ghaḌne vaale jhuTe sher sunane vaale
logo sabr ki apne kiye ki jald saza hain paane vaale
dard ankhon se bahta hai aur chehra sab kuchh kahta hai
ye mat likkho vo mat likkho aa.e baḌe samjhane vaale
ḳhud kaTenge apni mushkil ḳhud pa.enge apni manzil
rahzanon se bhi bad-tar hain rah-numa kahlane vaale
un se pyaar kiya hai ham ne un ki raah men ham baiThe hain
na-mumkin hai jin ka milna aur nahin jo aane vaale
un par bhi hansti thi duniya avazen kasti thi duniya
‘jalib’ apni hi surat the ishq men jaan se jaane vaale
Leave a Reply