in jhilmilate chand sitaron ki chhanv men
dhime suron men gaa.e jo babul to ham sunen
angan men tere phuul rahi hogi kamani!
ji chahta hai aaj basera vahin karen
ye chand aaj uga hai baḌi aarzu ke ba.ad
aao mai-e-nashat piyen gham ghalat karen
apni suhag-rat kabhi bhultin nahin
mere hasin dayar ki sharmili aurten
rang-e-hina se surḳh rahin un ki ungliyan
ai kaash saari umr vo dulhan bani rahen
pyare hain aaj ham bhi bahut der se niDhal
tum bhi thake hue ho chalo aao so rahen
jaane hai kaun mahv-e-safar aadhi raat ko
jaane ye kis ki duur se aati hain ahaTen
ham ko bula liya karo baten kiya karo
dil men tumhare dard ke tufan jab uThen
uftadgan-e-rah ke dil par lagegi choT
manzil pe ja ke qafile avaz yuun na den
tum ne tamam baagh ko viran kar diya
indhan ke tajiro ye papihe kahan rahen
har marhala pe ‘dauran’ hamen un ki ho talash
har manzil-e-hayat pe un ka hi naam len
Leave a Reply