Sultan Akhtar
ja chuka tufan lekin kapkapi hai
vaqt ki divar ab tak hil rahi hai
ham ne pahchana bahut logon ko lekin
ek ik surat abhi tak ajnabi hai
ab kira.e ke makan men ghuT raha huun
baap daada ki haveli bik chuki hai
roz kahte ho magar kahte nahin ho
vo kahani jo abhi tak an-kahi hai
kaise guzra paḌh ke andaza laga lo
vaqt ki tafsir chehre par likhi hai
andar andar main bikharta ja raha huun
koi shai rah rah ke mujh men TuTti hai
ghaas ug aa.i dar-o-divar-e-dil par
ḳhana-virani ka manzar didani hai
Leave a Reply