jab tak junun junun hai gham-e-agahi bhi hai
yaani asir-e-naghma miri be-khudi bhi hai
khilte hain phuul jin ke tabassum ke vaste
shabnam men un ke aks ki azurdagi bhi hai
kuchh saaton ka rang mire saath saath hai
vo nik.hat-e-bahar magar ajnabi bhi hai
zinda huun main ki aag jahannam ki ban sakun
firdaus-e-arzu mire dil ki kali bhi hai
is yaad ka bhanvar mere ehsas men raha
iz.har-e-mauj mauj ki na-guftani bhi hai
palkon pe chandni ke takallum ki aanch thi
honton pe guftugu ke liye tishnagi bhi hai
kyuun tirgi se is qadar manus huun ‘zafar’
ik sham-e-rah-guzar ki sahar tak jali bhi hai
Leave a Reply