ye jo insan ḳhuda ka hai shahkar
us ki qismat pe hai ḳhuda ki maar
marg-e-dushman ki aarzu hi sahi
dil se nikle kisi tarah to ghubar
naam badnam ho chuka hazrat
kijiye ab to jurm ka iqrar
hoga donon ka ḳhatma bil-ḳhair
ab tasadum men hai na jiit na haar
bik chuki jins-e-nadir-o-nayab
ho chuki ḳhatm garmi-e-bazar
ittifaqi hai do dilon ka milap
kaun sunta hai varna kis ki pukar
husn valon ka puchhna kya hai
jitne dilkash hain utne dil-azar
jiina marna hai ban paḌe ki baat
na ye asan aur na vo dushvar
kis ko parva ki in pe kya guzri
zindagi se jo ho ga.e bezar
multafit ḳhud na ho agar koi
aah be-sud aur fughan be-kar
pur-sukun niind chahte ho ‘nazir’
saath laana tha qismat-e-bedar
Leave a Reply