Jalal Lakhnavi
jaane vaala iztirab-e-dil nahin
ye taḌap taskin ke qabil nahin
jaan de dena to kuchh mushkil nahin
jaan ka ḳhvahan magar ai dil nahin
tujh se ḳhush-chashm aur bhi dekhe magar
ye nigah ye putliyan ye til nahin
rahte hain be-ḳhud jo tere ishq men
vo bahut hoshyar hain ghafil nahin
jo na siske vo tira kushta hai kab
jo na taḌpe vo tira bismil nahin
hijr men dam ka nikalna hai muhal
aap aa niklen to kuchh mushkil nahin
aa.iye hasrat-bhare dil men kabhi
kya ye mahfil aap ki mahfil nahin
ham to zahid marte hain us ḳhuld par
jo bahishton men tire shamil nahin
vo to vo tasvir bhi us ki ‘jalal’
kahti hai tum baat ke qabil nahin
Leave a Reply