Razi Akhtar Shauq
vo shaḳh-e-gul ki tarah mausam-e-tarab ki tarah
main apne dasht men tanha charagh-e-shab ki tarah
ḳhayal-o-fikr ki sachcha.iyan bhi shamil hain
mire lahu men mire shajara-e-nasab ki tarah
vo apni ḳhalvat-e-jan se pukarta hai mujhe
main chahta huun use harf-e-zer-e-lab ki tarah
ḳhusha ye daur ki vo bhi hai saath saath mire
mire ḳhayal ki surat miri talab ki tarah
main apne ahd ki avaz-e-na-rasa hi sahi
dhaḌak raha huun dilon men sukut-e-shab ki tarah
na khil ke ser hua main na jal ke raakh hua
ki meri pyaas bhi hai tere rang-e-lab ki tarah
Leave a Reply