Hadi Machlishahri
main kya huun kaun huun ye bhi ḳhabar nahin mujh ko
vo is tarah miri hasti pe chha.e jaate hain
ḳhayal hi abhi aaya tha ku-e-janan ka
ye haal hai ki qadam Dagmaga.e jaate hain
vo puchhte hain dil-e-mubtala ka haal aur ham
javab men faqat aansu baha.e jaate hain
kahan hai shauq bata ghairat-e-kashish teri
vo meri ḳhaak se daman bacha.e jaate hain
miTa rahe hain vo kyuun dagh-ha-e-dil ‘hadi’
charagh kyuun ye jala kar bujha.e jaate hain
Leave a Reply