Abid Malik
ik ajnabi ki tarah hai ye zindagi mire saath
jo vaqt kaat rahi hai hansi-khushi mire saath
suna raha huun kisi aur ko katha apni
khada hua hai koi aur aadmi mire saath
safar men ped ka saaya nahin milega mujhe
bas itna sunte hi divar chal padi mire saath
vo mujh ko pahle bhi tanha kahan samajhta tha
phir us ne meri udasi bhi dekh li mire saath
suna hai haal batane se dard ghatta hai
so ek roz charaghon ne baat ki mire saath
alaav jalta raha jab talak main chalta raha
main ruk gaya to kahani bhi ruk gai mire saath
Leave a Reply