Kausar Jayasi
ham tire gham ko jo purkar bana kar uTThe
nafas-e-garm ko talvar bana kar uTThe
aao ham hanste uThen bazm-e-dil-azaran se
kaun ehsas ko bimar bana kar uTThe
raat bhar tajraba-e-ḳhun-e-jigar ham ne kiya
sub.h-dam dasht ko gulzar bana kar uTThe
mahfil-e-raz men ham sah ga.e har vahm ki choT
aḳhir ik ishq ka me.aar bana kar uTThe
un nigahon ka taqaza-e-suḳhan yuun tha ki ham
be-zabani ko bhi ash.ar bana kar uTThe
jab pa.e-fikr-e-suḳhan ham kabhi baiThe ‘kausar’
sher ko misr ka bazar bana kar uTThe
Leave a Reply