saa.e Dhalne charag jalne lage
log apne gharon ko chalne lage
itni pur-pech hai bhanvar ki girah
jaise nafrat dilon men palne lage
duur hone lagi jaras ki sada
karvan raste badalne lage
us ke lahje men barf thi lekin
chhu ke dekha to haath jalne lage
us ke band-e-qaba ke jaadu se
saanp se ungliyon men chalne lage
rah-e-gum-karda ta.eron ki tarah
phir sitare safar pe chalne lage
phir nigahon men dhuul uḌti hai
aks phir aa.ine badalne lage
Leave a Reply