taqdir ke darbar men alqab paḌe the
ham log magar ḳhvab men be-ḳhvab paḌe the
yaḳh-basta havaon men thi ḳhamosh haqiqat
ham soch ki dahliz pe betab paḌe the
tasvir thi ehsas ki tahrir hava ki
sahra men tire aks ke girdab paḌe the
kal raat men jis raah se ghar lauT ke aaya
us raah men bikhre hue kuchh ḳhvab paḌe the
vo phuul jinhen aap ne dekha tha ada se
ujḌe hue mausam men bhi shadab paḌe the
pachchis baras baad use dekh ke socha
ik qatra-e-kam-zat men gharqab paḌe the
ham log to aḳhlaq bhi rakh aa.e hain ‘sahil’
raddi ke isi Dher men adab paḌe the
Leave a Reply