yuun sitamgar nahin hote janan
phuul patthar nahin hote janan
kyuun mire dil se kahin jaate ho
ghar se be-ghar nahin hote janan
vasl ki shab jo karam tum ne kiye
kyuun mukarrar nahin hote janan
ham tumhen but ki tarah pujte hain
phir bhi kafar nahin hote janan
gham ke dipak nahin jalte jab tak
dil munavvar nahin hote janan
ham to rahte hain tumhari had men
had se bahar nahin hote janan
ek jaise hain ḳhushi ke lamhe
dukh barabar nahin hote janan
is qadar ḳhuun na bahana dil ka
dil samundar nahin hote janan
Leave a Reply