ek be-manzar udasi char-su ankhon men hai
jitna baaqi hai mire dil ka lahu ankhon men hai
jism-o-jan pamal-e-sadmat-e-taghaful ho chuke
ab to jo hai mavara-e-guftugu ankhon men hai
ḳhatm hota hi nahin bedar lamhon ka azaab
niind jaise koi zaḳhm-e-be-rafu ankhon men hai
tishnagi ka ik parinda chiḳhta hai zehn men
qarya-e-jan ki ye kaisi ab-ju ankhon men hai
bahte ashkon par likhi tahrir raushan hai abhi
ek va.ada ek paikar hu-ba-hu ankhon men hai
main bayaban ki bikharti dhuup huun be-samt-o-saut
ab koi sauda hai sar men aur na tu ankhon men hai
kis taraf dekhun ‘mujibi’ kis se rishta joḌ luun
ru-ba-ru duniya hai phir bhi dasht-e-hu ankhon men hai
Leave a Reply