Shah Naseer
yaaro nahin itna mujhe qatil ne sataya
jitna ki mare dushman-e-jan dil ne sataya
kuchh sarzanish-e-kar ka shaki vo nahin hai
majnun ko to hai sahib-e-mahmil ne sataya
ghuncha kahun ya durj-e-guhar tere dahan ko
khulna nahin is uqda-e-mushkil ne sataya
aram se soya na kamar ka tiri kushta
marqad men bhi muran-e-tah-e-gil ne sataya
us ka mujhe shab yaad dilaya ruḳh-e-pur-nur
shakl apni dikha kar mah-e-kamil ne sataya
mera dil-e-sauda-zada karta na kabhi ghul
is kakul-e-pechan ke salasil ne sataya
afyun ki kisi roz main kha ja.unga goli
be-vajah ruḳh-e-yar ke gar til ne sataya
jab bosa main mangun huun to kya kahte ho munh pher
aisa to kisi bhi nahin saa.il ne sataya
har ja mutajalli hai vo be-parda va-lekin
ghaflat ke mujhe parda-e-ha.il ne sataya
tha ek to sayyad giraftar qafas men
aur dusre avaz-e-anadil ne sataya
ai ham-safaran pesh-ravi ki nahin taqat
kya kiije hamen duri-e-manzil ne sataya
pahlu men ‘nasir’ aah nahin hai dil-e-muztar
is sher-e-gham-aluda-e-be-dil ne sataya
Leave a Reply