Idris Babar
kisi ke haath kahan ye ḳhazana aata hai
mire aziiz ko har ik bahana aata hai
zara sa mil ke dikhao ki aise milte hain
bahut pata hai tumhen chhoḌ jaana aata hai
sitare dekh ke jalte hain ankhen malte hain
ik aadmi liye sham-e-fasana aata hai
abhi jazire pe ham tum na.e na.e to hain dost
Daro nahin mujhe sab kuchh banana aata hai
yahan charagh se aage charagh jalta nahin
faqat gharane ke pichhe gharana aata hai
ye baat chalti hai sina-ba-sina chalti hai
vo saath aata hai shana-ba-shana aata hai
gulab cinema se pahle chand baagh ke ba.ad
utar paḌunga jahan karḳhana aata hai
ye kah ke us ne semester break kar Daala
suna tha aap ko likhna likhana aata hai
zamane ho ga.e dariya to kah gaya tha mujhe
bas ek mauj ko kar ke ravana aata hai
chhalak na jaa.e mira ranj meri ankhon se
tumhen to apni ḳhushi ko chhupana aana hai
vo roz bhar ke ḳhala.i jahaz uḌate phiren
hamen bhi raj ke tamasḳhur uḌana aata hai
pachas miil hai ḳhushki se bahriya-town
bas ek ghanTe men achchha zamana aata hai
break-dance sikhaya hai naav ne dil ko
hava ka giit samundar ko gaana aata hai
mujhe defence ki lingua-franca na.iin aati
tumhen to sadr ka qaumi tarana aata hai
mujhe to ḳhair zamin ki zaban nahin aati
tumhen mirriḳh ka qaumi tarana aata hai
Leave a Reply