kaliyan chatak rahi hain baharon ki god men
jalvon ki mahfilen hain sitaron ki god men
vo mauj jis ke khauf se patvar gir pade
kashti ko le gai hai kinaron ki god men
manzil simat ke khud hi mire paas aa gai
main sar-garan thi rah-guzaron ki god men
yuun to diye fareb saharon ne umr bhar
dil ko bada sukun tha saharon ki god men
tera khayal teri mohabbat gham-e-hayat
sab so gae hain vaqt ke dharon ki god men
manus ho gai huun khizan se ye soch kar
kuchh bhi nahin ‘nasim’ baharon ki god men
Leave a Reply