Hatim Ali Mehr
ajab hai ‘mehr’ se us shokh ki visal ka vaqt
vo dopahar ki jo makhsus hai zaval ka vaqt
miri to khaak bhi tere qadam na chhodegi
zara tu aane to de apne paemal ka vaqt
chaman ki sair hai bulbul pade chahakti hain
hamare aap ke bhi hai ye bol-chal ka vaqt
karo na zikr raqibon ka mujh se raag na laao
khata muaaf nahin hai ye us khayal ka vaqt
ab un ki chaal qayamat hai kyuun na dil pis jaae
abhi guzar gaya kabk-e-dari ki chaal ka vaqt
masal hai aankh bachi maal doston ka hua
zamana daulat-e-duniya ka hai khayal ka vaqt
kahan ye nok-palak phir kahan ye husn-e-shabab
idhar ko dekho yahi to hai dekh-bhal ka vaqt
duaen denge unhen ye faqir kambal-posh
ilahi duur do-shale ka hove shaal ka vaqt
Leave a Reply