chahta huun ki tira hijr musibat na lage
ab koi zaḳhm tire gham ki badaulat na lage
us ki yadon ka safar ḳhatm karun ro.e baghair
ghair mumkin hai ki is kaam men hikmat na lage
zarf TuuTe hue kashkol se gir sakta hai
aisi imdad se bachna jo saḳhavat na lage
shahr-dar-shahr mujhe ḳhaak uḌani hai magar
is pe ye shart masafat bhi masafat na lage
aao a.amal-tarashi ki rehearsal kar len
taaki jab us ko pukaren to mashaqqat na lage
ek sajda miri peshani ko darkar hai jo
hasb-e-taufiq lage hasb-e-zarurat na lage
tab main samjhunga ki is nafs ne khaa.i hai shikast
ra.egan shai jo mujhe mal-e-ghanimat na lage
Leave a Reply