ḳhaak un galiyon ki palkon se bahut chhani thi
phir bhi surat miri is shahar men an-jani thi
ham bhi kuchh apni vafaon pe hue the nadim
un ko bhi tark-e-ta.alluq pe pashemani thi
ḳhud-farebi to alag baat hai varna ham ne
apni surat kahan a.ine men pahchani thi
zindagi sang bani thi tujhe ruḳhsat kar ke
dil na dhaḌka tha to marne men bhi asani thi
hadisa saḳht tha jankah tha ab ke yaaro
varna ham ne to kabhi haar nahin maani thi
rah ga.i raah men yuun sharm-e-shikasta-pa.i
kya Thaharte kahin vo be-sar-o-samani thi
na-rasa.i koi kis aankh se dekhe apni
ham bhi TuuTe hue par, raat bhi tufani thi
gul hui sham.a to daman bhaḌak uTTha ‘hashami’
jab nazar bujh ga.i virani hi virani thi
Leave a Reply