niist be-yar mujh ko hasti hai
shahr-e-viran ujaaḌ basti hai
hai jahan par mira qadam bhari
har qadam par zamin dhansti hai
vo pari saath le ke sota huun
huur jis ka palang kasti hai
hai haqiqat majaz se matlub
but-parasti ḳhuda-parasti hai
us ke kushte hain zinda-e-javed
nisti un ki ain hasti hai
ek but ne diya na ham ko javab
be-zabanon ki hind basti hai
ḳhaksaron ki hai yahi me.araj
sar-bulandi hamari pasti hai
hai ka.i din se ghaat men sayyad
andalib aj-kal men phansti hai
is muraqqa.a ki dekh tasviren
koi roti hai koi hansti hai
manzil-e-ishq ki hai rah hamvar
na bulandi hai yaan na pasti hai
husn dikhla raha hai qudrat-e-haq
but ko bhi zauq-e-ḳhud-parasti hai
jaan bhi de kar mile to muft samajh
har tarah jins-e-husn sasti hai
zulf us ki siyah nagin hai
maar rakhti hai jis ko Dasti hai
khulengi ankhen nashsha utrega
husn tak uupri ye masti hai
aise jiine pe ‘rind’ ḳhaak paḌe
maut us zindagi pe hansti hai
Leave a Reply