abas hai duuri ka us ke shikva baghal men apne vo dil-ruba hai
chubhi hai qalib men jis tarah jaan use tariqe se vo chhupa hai
makan bhi hai vo makin bhi hai vo vahi mila hai vahi juda hai
usi ka jalva har ek su hai vahi hai zahir vahi chhupa hai
gham-e-mohabbat hai us ka jis ko nahin vo gham ain hai vo rahat
kharab jo ishq men hai us ke nahin vo bigda bana hua hai
na parsai namaz se hai na roza-dari hai zohd-o-taqva
mai-e-mohabbat piye jo us ki vahi haqiqat men parsa hai
vo ranj akhir ko hoga rahat vo marg-e-umr-e-davam hogi
jo ishq-e-sadiq men mar mita tu to phir abas shaki-e-jafa hai
na koi dushman na dost apna na nek-o-bad se hamen taalluq
jo chashm-e-vahdat se ham ne dekha na kuchh bura hai na kuchh bhala hai
jo dard-e-hijran se jan-ba-lab hai ilaaj mumkin hai us ka kyunkar
masih samjhe hain jis ko vo khud maraz men ulfat ki mubtala hai
jahan men sadha hazar-ha ghar base jo the vo ujad gae hain
na hoga viran khana-e-dil jahan vo but aa ke bas gaya hai
jo hai talabgar us ka sadiq hua hai donon-jahan se farigh
na hur-o-ghilman ka hai vo khvahan na vo hasinon pe shefta hai
zaban-e-insan men kab hai qudrat kare jo izhar-e-shan-e-vahdat
na ibtida se hai koi vaqif na us ki maalum intiha hai
utha le fazl-o-karam se yarab karim hai aur rahim tu hai
jo ‘barq’ bar-e-azim-e-isyan se gir ke dar par tire pada hai
Leave a Reply